Yera un lluchador antifranquista comprometíu, militante del Partíu Comunista y que siguió hasta l’últimu momentu defendiendo los sos ideales.
En abril del 2014 La Comuna d’Asturies presentaba en rueda de prensa los primeros denunciantes que diben dir al Consuláu de l’Arxentina en Madrid a sumase a la conocida como Querella Arxentina. Había nietos y nietes de víctimes de la guerra civil, pero tamién un grupu de militantes veteranos de la llucha contra’l dictador, cuatro nomes d’entre toa esa xente d’a pie que traxo la democracia: José’l Gallegu, que yá nos dexó, Vicente Gutiérrez Solís, Anita Sirgo y Fausto.
Na so denuncia recordaba les tortures sufríes en comisaría y dicía los nomes de los torturadores, dellos yá muertos, pero dalgún tovía vivu y impune, como Pascual Honrado de la Fuente. Nes declaraciones a la prensa siempre repetía que nun quería morrer ensin ver sentáu al so torturador delantre d’un xuez.
A pesar de la so edá y los sos problemes físicos, siempre cuntemos con él. Viaxó a Madrid al Consuláu a presentar la denuncia y tamién nos acompañó nes nuestres ruedes de prensa cuando él y los sos compañeros presentaron la mesma denuncia nos xulgaos asturianos. Nun se dexó apoderar pol desánimu cuando la desestimaron y volvió quexase de la falta de xusticia cuando tovía nel mes de payares del 2018, con 90 años, tuvo con nós p’anunciar el recursu d’amparu énte’l Tribunal Constitucional, acompañáu de Gerardo Iglesias y Vicente Gutiérrez Solís, tamién denunciantes.
Como tien dicho tantes veces Ana Messuti, abogada de la Querella Arxentina, ye evidente que’l tiempu de les víctimes nun ye’l tiempu de la xusticia. Recordémoslo va unos díes al enteranos de la muerte de Chato Galante y volviemos sentilo con tola crudeza cuando nos cuntaron que faltaba Fausto. Lluchar polos derechos tien esa parte ingrata: siguir andando sabiendo que, quiciabes, van ser otres persones les que lleguen al final del camín pol que se llucha. Ellos, que lo sabíen, siguieron adelantre hasta l’últimu minutu. Por eso nós vamos siguir y garrar el so testigu. La llucha pola verdá, la xusticia y la reparación merezlo. El recuerdu del so exemplu va danos la fuercia y el coraxe.
