MANIFESTACIÓN POLES LLIBERTAES SINDICALES Y LA LLIBERTÁ DE LES 6 DE LA SUIZA.
SÁBADU 28 SETIEMBRE. 12:00 h. PLAZA L’HUMEDAL. XIXÓN. ASTURIES.
ENTAMEN: CCOO, CNT, CXT, CT, CSI, ISA, NTERSINDICAL, SUATEA, UXT, USO Y RCT.
SOFITEN: GRUPU SOFITU A LES 6 DE LA SUIZA, SAD Y SINDICATU ESTUDIANTES.
¡POLES LLIBERTAES SINDICALES!. ¡POLA LLIBERTÁ DE LES 6 DE LA SUIZA!.
¡PORQUE FACER SINDICALISMU NUN YE DELITU!.
Asturies Insumisa
Como yá ye del dominio públicu, en 2017, una emplegada de la pastelería La Suiza denunció les penoses condiciones llaborales nes que tenía que desarrollar el so trabayu. La negativa la empresa a negociar una salida apautada dio llugar a una campaña de denuncia pública, propia de la normal actividá sindical.La pastelería, que taba en quiebra previa y llevaba un añu en venta, acaba por pesllar; pero’l conflictu continúa pela vía xudicial. La empresa pon en marcha hasta 35 denuncies, que los xulgaos desestimen. Pero una d’eses condenes yá archivaes termina n’otru xulgáu, que xeneró dos condenes pa caúna de Les 6 de La Suiza: 2 años de prisión por obstrucción a la Xusticia y 18 meses por coaiciones, asina como una multa de 125.000 euros. Llama l’atención la desproporción d’estes condenes, pero, sobre too, hai que destacar que nenguna d’eses condenes obliga a entrar en prisión. Por embargo, acumuláronse dambes condenes pa poder encarcelales. Esto namás tien una interpretación posible: trátase d’un castigu a una trabayadora y a 5 persones que l’acompañaben; trátase de convertir en xurisprudencia un castigu exemplarizante pa tol sindicalismu y pa tola sociedá; tratase, a la fin, de coartar y reprimir l’exerciciu de les llibertaes sindicales.
Esta sentencia tien un oxetivu claru: facer que’l mieu a la condena xudicial desactive la llucha sindical de las y los trabayadores y de les sos organizaciones de defensa. Quieren que se sepa que cualesquiera puede ser condenáu o condenada si se-y ocurre esixir los sos derechos, pidir la negociación d’un conflictu o protestar con aiciones sindicales, magar qu’estes aiciones seyan llegales dafechu.
Too ello representa un cambiu radical hacia un modelu social retrógadu, nel que’l poder pretende desactivar, mediante’l mieu, la llucha de la clas trabayadora y desaniciar los derechos sindicales y les llibertaes ciudadanes qu’hasta agora algamamos con enorme esfuerzu.
Pero, a estes altures, Les 6 de La Suiza yá tienen el sofitu de miles d’asturianes y asturianos y de la práutica totalidá de los sindicatos d’Asturies. Esta solidaridá manifiéstase, tamién, nes decenes de movilizaciones que vienen realizándose per tola xeografía del Estáu español y de la Unión Europea, a convocatoria de numberoses organizaciones sindicales.
Les nuestres 6 compañeres marcáronnos un camín. La reivindicación de los derechos de les y los trabayadores ye un derechu fundamental y nun podemos permitir que nenguna llei lu ponga en tela xuiciu o qu’una sentencia arbitraria y desproporcionada lu torne nun delitu.
Facer sindicalismu ye lo que ficieron y siguen faciendo les nueses 6 compañeres de La Suiza y vamos tar con elles hasta algamar la so llibertá dafechu.
¡POLES LLIBERTAES SINDICALES!..
|
Bear Blog.
mastodon. |
|
Para saber daqué más del allunáu, visita la páxina de presentación. |
|
