CONCENTRACIÓN POLA DECLARACIÓN DE MARTÍN VILLA ÉNTE LA XUSTICIA ARXENTINA
Esti xueves 3 de setiembre,
Rodolfo Martín Villa va declarar per videoconferencia na Embaxada Arxentina en
Madrid delantre de la xueza María Servini de Cubría, qu’instruye la conocida
como Querella Arxentina nel Xulgáu n.u 1 de Buenos Aires. Por esi motivu, La
Comuna d’Asturies —la entidá asturiana que forma parte de la Coordinadora
Estatal d’Apoyu a la Querella Arxentina— y la Federación Asturiana Memoria y República
(FAMYR) convoquen esi mesmu día, a les 19:30 hores, na Plaza de Porlier
d’Uviéu, una concentración.
La declaración del ex-ministru franquista supón un primer pasu pa poner fin a
la impunidá de los crímenes contra la humanidá cometíos cuando la dictadura de
Franco. A lo llargo de los más de 40 años de democracia que siguieron a la
muerte del dictador, esa impunidá caltuviéronla tolos gobiernos. Naciones Uníes
tien denunciao bien de veces lo inaceptable d’esa política d’impunidá, que va
contra tolos estándares internacionales y que torga l’accesu a la xusticia a
les víctimes d’estos crímenes.
Na dictadura franquista centenares de miles de persones sufrieron violaciones
gravísimes de derechos humanos: desapaiciones, fusilamientos, robu de neños,
trabayu esclavu, malos tratos y abusos en campos de concentración, cárceles,
comisaríes, cuarteles, preventorios, tortures, detenciones arbitraries,
persecuciones, etc. Nos últimos años d’esa dictadura, Martín Villa foi una de
les pieces claves de la represión xeneralizada y sistemática contra la
población civil. Por eso ye ún de los reclamaos pola Xusticia arxentina como
responsable de crímenes contra la humanidá.
Hai más de 1.000 querelles y denuncies na conocida como Querella Arxentina,
tanto de víctimes individuales como d’instituciones y asociaciones. Alredor de
40 conceyos en tol Estáu presentaron, o tán en trámites de facelo, querelles
criminales énte los Xulgaos españoles pa que s’investiguen los crímenes contra
la humanidá cometíos nos sos territorios. Tamién se presentaron énte la
Xusticia española munches querelles por delitos de tortures, homicidiu y
lesiones, desapaición forciada… toes nun contestu de crímenes contra la
humanidá. Hasta la fecha, nenguna de les presentaes nel Estáu español s’almitió
a trámite.
Los gobiernos socesivos y la xudicatura española negáronse a estraditar a
Martín Villa a Arxentina pa la so toma de declaración. Tamién se negaron a que
la xueza Servini viniera al Estáu español pa toma-y declaración y,
evidentemente, negáronse a xulgalu nos propios tribunales españoles.
Con esta toma de declaración dase un primer pasu, pero ye menester qu’haya
munchos otros pasos pa que’l derechu a la tutela xudicial efectiva de les
víctimes del franquismu y los sos familiares seya una realidá. La sociedá civil
tien que lo esixir a los poderes públicos y esta concentración ye una llamada
d’atención dende’l movimientu memorialísticu d’Asturies.
Hai que recordar que pa l’asistencia a la concentración ye obligatoriu l’usu
de la mázcara, amás de la caltener la distancia de seguranza necesaria.
