Esti xueves la
Xunta pola Defensa de la Llingua Asturiana (XDLA) va entamar una concentración alredor de la Xunta Xeneral porque “ye ehí onde se tien que producir el debate de la reforma que necesita l’Estatutu”. La bandera de la oficialidá col corazón multicolor va protagonizar la convocatoria prevista pa les 19.30 hores.
“Agora empieza otru periodu de sesiones na Xunta Xeneral y igual ye’l definitivu. Nun aceptemos nengún plazu pa da-y carpetazu a esti tema que nun sea’l final de la llexislatura”, espresaron Xosé Candel y María Xosé Martínez. “Y nun aceptamos otru foru de debate que nun seya la Xunta Xeneral”, siguieron los representantes de la XDLA, qu’esplicaron que “la concentración del xueves ye pa llamar l’atención na cai, precisamente y simbólicamente enfrente y alredor de la Xunta Xeneral”.
El coleutivu cívicu señala que la Federación Socialista Asturiana (FSA-PSOE), como formación que sostién el Gobiernu, ha ser la responsable de llevar un proyeutu al Parllamentu pal so alderique, posicionamientu de les fuercies favoratibles y contraries, y votación. “Da la impresión que quieren tenelo too fecho enantes, amarrao”, señala Candel.
Sobre la situación actual de les negociaciones espresa que “somos optimistes” porque “tenemos la razón y yá valió que l’asturianu sía una llingua oprimida”, al tiempu qu’asegura nun tar d’alcuerdu “nel usu d’otros asuntos que son ayenos al debate estatutariu y que nada tienen que ver cola llingua como contrapartida o contraprestación pal reconocimientu d’un derechu que se comparte cola mayoría”. Sicasí, la XDLA ve bien los movimientos últimos si sirven “pa desantracar” les conversaciones.
Artículu 4
“Queremos una oficialidá que reconoza el derechu a usar l’asturianu o’l gallego-asturianu igual qu’el que yá esiste pal castellanu, ensin condicionantes sobre la llei que la va tener que desenrrollar, ye dicir rechazamos la esixencia d’una mayoría cualificada pa poder regular la oficialidá en tolos ámbitos”, apuntaron sobre la demanda de los trés quintos afitada por Foro como llinia collorada y aceptada poles trés fuercies d’izquierda. En concreto la redaición del artículu 4 propuestu pola XDLA ye la siguiente:
-
L’asturianu y el gallego-asturianu, como llingües propies d’Asturies, tienen, col castellanu, el calter de llingües oficiales.
-
Los poderes públicos d’Asturies, atendiendo a la realidá sociollingüística del asturianu y del gallego-asturianu, han garantizar el derechu a conoceles y usales.
-
Una llei de la Xunta Xeneral ha establecer los términos y ámbitos del usu oficial de les llingües propies d’Asturies y ha fixar les zones d’usu predominante d’entrambes.
-
Nenguna persona va poder ser discriminada n’Asturies pola llingua que llibremente escueya pa comunicase.
Por último la organización critica a los partíos que se ponen “de perfil”, los que tienen “postures diferentes respecto a la oficialidá d’otres llingües notres comunidaes autónomes de la que defenden equí, que sepan que nun cuela l’eslogan ‘asturianu sí, oficialidá non’” porque “ye un mensaxe mentirosu y cínicu; porque cualquiera pue comprobar que los que lo sostienen nunca aprovechen les posibilidaes que da la Llei d’Usu, sinón que más bien la utilicen en negativo, pa reprimir o negar derechos, pa roba-y espacios al asturianu…”. Nesi sen recuerda que “impedir la oficialidá ye tar del bandu de los intolerantes, los que promueven el despreciu pola cultura propia, la discriminación de los falantes y l’autoodiu”.
"Tenemos ilusión de sobra"
La concentración del xueves ta programada a les 19.30 y va consistir en dar una vuelta a la Xunta Xeneral amosando les banderes del corazón multicolor de la campaña entamada pola XDLA faciendo una ‘O’ xigante que representa la oficialidá. “Un actu que se va desendolcar pacíficamente y cívicamente, cumpliendo les normes sanitaries que tean vixentes, como venimos avezando facer”, apunten.
Darréu va facese una llectura del manifiestu enfrente de Presidencia, tres el Parllamentu, pol papel qu’ha xugar Adrián Barbón y el so partíu nesti procesu de reforma del Estatutu qu’incluya la oficialidá. “Que sepan que nun nos vamos dar, tenemos ilusión de sobra y la fuerza que nos da la razón”, aseguren los responsables del coleutivu.
COMUNICÁU CONCENTRACIÓN XUNTA XENERAL
Otra vez los corazones multicolores vuelven a ondiar n’Uviéu. Otra vez los falantes de les llingües propies d’Asturies tienen que salir a la cai a dicir que yá ta bien, que tenemos unos derechos y que se tienen que reconocer.
Depués de 40 años d’esta reivindicación, ¿entá tamos asina, reclamando a les puertes de la Xunta Xeneral que se reconozan unos derechos que n’otres comunidaes yá tienen dende va décades? ¿Cómo se pue falar de normalidá democrática? Tamos nel 2022 y n’Asturies sigue considerándose llegalmente que les sos llingües propies son de segunda categoría porque nun tienen reconocimientu oficial como les demás.
Cuando nel 2019 el PSOE ganó les elecciones llevando nel programa electoral la oficialidá, la esperanza de qu’eso cambiara medró. Y más cuando se formó’l Gobiernu y l’aritmética parllamentaria fixo pensar que la reforma estatutaria yera inminente. Pero llegó la pandemia y esi procesu paróse. Otres coses nun les pararon, pero como llevamos 40 años esperando debieron pensar que podíemos esperar otros dos. Somos una comunidá de falantes maltratada yá demasiaos años y esi maltratu tien qu’acabar yá, nesta llexislatura.
Esta concentración ye una llamada d’atención a los nuestros representantes políticos. Venimos a dici-yos a les puertes de la Xunta Xeneral qu’esta oportunidá tien que ser la definitiva. Nun aceptamos nengún plazu pa resolver esti asuntu que nun seya’l fin de la llexislatura.
Venimos a dici-yos que traigan equí’l debate de la reforma estatutaria y de la redacción del artículu cuartu. Nes últimes elecciones votóse mayoritariamente a partíos que dicíen defender los derechos llingüísticos d’asturianos y asturianes, así que queremos que’l PSOE, el partíu que caltién al Gobiernu, lleve al plenu un proyectu pa que tolos grupos parllamentarios se pronuncien.
La nuestra propuesta de redacción del artículu cuartu ye pública y conocida de tolos partíos: una oficialidá que reconoza’l derechu a usar l’asturianu y el gallego-asturianu igual que’l que yá tienen les persones qu’usen el castellanu.
Nun aceptamos condicionantes pa desenvolver esi derechu. ¿A qué vien esixir una mayoría cualificada pa poder regular la oficialidá en tolos ámbitos? ¿Quieren aplazar el debate? ¿Quieren dexar correr el tiempu a ver si desapaez el problema o hai una mayoría de partíos contrarios que lu aparquen indefinidamente?
Tamién venimos a dici-yos que nun tamos d’alcuerdu n’introducir nel debate asuntos que nada tienen que ver colos derechos llingüísticos como contrapartida pa votar a favor. O se ta pol reconocimientu de derechos o se ta pola limitación de derechos. Yá lo diximos milenta veces: o yes un partíu que ta pola tolerancia y l’ampliación de llibertaes o yes un partíu que ta pola intolerancia y la negación de derechos. Foro tien que decidise yá pa que sepamos a qué nos atener.
La postura de la derecha intolerante, de Vox, PP y Ciudadanos, yá la conocemos. Hailos más acérrimes y ultramontanos y hailos que quieren vender esa idea tramposa y cínica de “asturianu sí, oficialidá non”. Cualquiera pue comprobar que los que dicen eso nunca usen l’asturianu y namás s’alcuerden d’ello pa reprimir o negar derechos, pa roba-y espacios. Tar en contra de reconocer oficialmente l’asturianu y el gallego-asturianu ye tar a favor de la discriminación llegal, así que nun nos vengan con cuentos.
Sabemos que van intentar enfriar les espectatives alredor de la reforma estatutaria, semando desánimu y sensación de derrota. Vímoslo toos estos meses y nes últimes selmanes nes columnes de los periódicos asturianos un día sí y otru tamién. Pues equí tamos: güei y les veces que faiga falta salir a la cai a pidir lo que llevamos 40 años pidiendo.
Tenemos l’enfotu que nos da ser sabedores de los derechos que nos asisten y tenemos amás la fuercia de munches décades de llucha incansable. Nun nos vamos dar y vamos siguir recordándo-yoslo a los nuestros representantes políticos. Ta muncho en xuegu: el futuru de les llingües d’Asturies. La ocasión merez la responsabilidá de tolos partíos que tán na Xunta Xeneral. Tean a l’altura.
¡OFICIALIDÁ ENSIN TORGUES!
¡YÁ,YÁ,YÁ, OFICIALIDÁ!
